2023–2024 കാലയളവിൽ ഈരാറ്റുപേട്ടക്കെതിരെ നടന്ന വിദ്വേഷ പ്രചാരണങ്ങളെ സമഗ്രമായി രേഖപ്പെടുത്തുന്ന ഈ പുസ്തകം, ഇസ്ലാമോഫോബിയയുടെ ഭാഷയും യുക്തിയും പ്രചാരണ രീതികളും തുറന്നുകാട്ടുന്ന ഒരു നിർണായക ഡോക്യുമെന്റായി മാറുന്നു. കേരളത്തിൽ ഇസ്ലാമോഫോബിക് ആക്രമണങ്ങൾ ആവർത്തിച്ച് ലക്ഷ്യമാക്കപ്പെടുന്ന പ്രദേശങ്ങളിൽ ഈരാറ്റുപേട്ടയ്ക്ക് പ്രത്യേക സ്ഥാനമുണ്ട്. മുഖ്യധാരാ മാധ്യമങ്ങളുടെ റിപ്പോർട്ടുകളിൽ നിന്നാരംഭിച്ച് പൊതുചർച്ചകളിലേക്കും, പ്രത്യേകിച്ച് യൂട്യൂബ് ഉൾപ്പെടെയുള്ള സാമൂഹ്യമാധ്യമങ്ങളിലേക്കും വ്യാപിച്ചിരിക്കുന്ന ഈ പ്രചാരണങ്ങൾ ഈരാറ്റുപേട്ടയെ സ്ഥിരമായി “പ്രശ്ന പ്രദേശം” ആയി ചിത്രീകരിക്കുന്നു. ഈ പ്രചാരണങ്ങളുടെ ലക്ഷ്യം, ഈരാറ്റുപേട്ടയിലെ ജനങ്ങളെ മറ്റു മതസ്ഥരോട് ആദരവില്ലാത്ത ജനവിഭാഗമായി അവതരിപ്പിക്കുകയെന്നതാണ്. യുക്തിപൂർവ്വമായ വിശകലനത്തിനുപകരം മുൻകൂട്ടി നിർമ്മിച്ച ഇസ്ലാമോഫോബിക് ധാരണകളെ ശക്തിപ്പെടുത്തുന്ന ഇത്തരം വിവരണങ്ങൾ സാമൂഹികമായി അപകടകരമായ പ്രതിച്ഛായകൾ സൃഷ്ടിക്കുന്നു.